Wanamgambo kadhaa wa kundi la kigaidi la al Shabab wameuawa katika
oparesheni iliyofanywa na jeshi la Somalia katika maficho ya kundi hilo
kusini mwa nchi hiyo.
Duru za kiusalama za Somalia zimetangaza kuwa jeshi la nchi hiyo jana
Ijumaa lilitekeleza oparesheni karibu na mji wa bandari wa Kismayo
katika jimbo la Jubaland na kuwauwa wanamgambo sita wa kundi la al
Shabab.
Duru hizo zimesisitiza kuwa oparesheni hiyo ya jeshi ambayo imeanza
kwa lengo la kuharibu maficho ya kundi la al Shabab itaendelea katika
siku zijazo.
Kundi la kigaidi la al Shabab linaendelea kufanya mashambulizi dhidi
ya raia na askari usalama huko Somalia licha ya jeshi la nchi hiyo
kuendesha operesheni ya kuwaangamiza wanamgambo wa kundi hilo nchini
humo.
Kundi la al Shabab ambalo lilikuwa likiyadhibiti baadhi ya maeneo ya
katikati na kusini mwa Somalia, mwaka juzi wa 2015 lilipoteza udhibiti
wa miji mikubwa na hivi sasa linadhibiti maeneo kadhaa katika baadhi ya
miji ya Somalia.
CHANZO: parstoday.
Comments